Kommentar iwwert den CSV-Nationalkongress

"Zesumme no vir kucken". Dat war de Motto um CSV-Nationalkongress.

No de Walen vum Nationalkomitee geet et elo drëms d’CSV intern op d’Oppositiounsaarbecht virzebereeden, esou den neien CSV-President Marc Spautz.

Eng richteg Opbrochs-Stëmmung gouf et e Samschdeg um National-Kongress vun der CSV net, esou de Gil Goebbels an engem Kommentar:

[audio mp3="http://www.100komma7.lu/emissions/wp-content/uploads/csv-gg.mp3"]

 

De ganzen Text:

Et sollt de National-Kongress vun der Erneierung sinn. Um Schluss waren et awer déi al bekannte Käpp déi den Toun uginn hunn an dat nom Motto « um Wee zeréck an d’Zukunft ».

D’Äntwert déi de Chef vun der Oppositioun de reform-bereeden CSV-Memberen ginn huet war déi heiten : “Mir kënnen eise Profil elo schäerfen, dofir brauch een kee programmateschen Nei-Opbau vun der Partei ze maachen. Déi Moderniséierung déi amgaangen war muss viru goen.” Ergo gëtt et och kee Grond fir eng Personal-Erneierung an der CSV. Kontinuitéit ass ugesot.

An esou koum et dann och... d’Kandidaten fir de Posten vum Generalsekretär, déi de “Renouveau” vun der Partei wollten verkierperen, sinn eidel ausgaang. Si goufen mat enger Resolutioun mat vill gudde Virsätz getréischt, an där zum Beispill steet d’Partei-Féierung soll mat der CSJ iwwert hier Fuerderungen “diskutéieren”.

D’Enttäuschung muss also grouss gewiescht sinn bei all deenen déi gehofft haten d’Partei-Spëtzt géif virun allem och sech a Fro stellen a villäicht och d’Responsabilitéit fir déi aktuell Situatioun iwwerhuelen.

A senger Ried huet de Jean-Claude Juncker allerdéngs een an Tëscht bekannte Refrain widderholl, dass d’CSV an d’Oppositioun gedrängt gouf an dat obwuel se 34 Prozent vun de Stëmmen krut. An dass dat eemoleg an der Geschicht vu Lëtzebuerg wär.

Am Raum stoen bleift d’Remarque déi de Serge Hoffmann, Kandidat fir den General-Sekrétärs-Posten, a senger Ried gemaach huet : “D’CSV ass déi stäerksten Partei an awer sinn mer an der Oppositioun. Also muss eppes schif gelaf sinn.”

 

Net verpassen

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen