Käschte vun der Banke-Reguléierung
Déi zousätzlech Reguléierung vum Finanzsecteur huet eleng d’läscht Joer de Finanzinstituter zu Lëtzebuerg 380 Milliounen Euro kascht. Dat ass d’Schätzung déi aus enger Etude ervirgeet, déi d’Bankenassociatioun ABBL an d’Consultingfirma “Ernst and Young” gemaach hunn. Déi nei Reegelen um Niveau vun den Taxen, vun de Fongen, vun de Transaktiounen, vun de Marchéen oder nach vun der “prudentieller Iwwerwaachung”, hätten d’Finanzinstituter och gezwongen hiert Personal ëm 9 Prozent ze verstäerken.
Obwuel d’nächst Joer nach weider Reegele bäikommen, wéi den automateschen Informatiounsaustausch oder nach d’Erweiderung vun der Zënsbesteierungsdirektive (fir nëmmen zwou nei Reguléirungen ze nennen), geet den ABBL-Direkter Serge de Cillia net dovunner aus, datt d’Finanzplaz wäert ofbauen. Hie warnt awer, datt d’Banken och wéinst dem niddregen Zënstaux ëmmer méi Schwieregkeeten hunn hier Margen ze maachen.
De ganzen Interview vum François Aulner mam Serge de Cillia:
