Juncker : "Ginn dovun aus, datt ech EU-Kommissiounspresident ginn"

“Well ech dovun ausginn, datt d’Europäesch Vollekspartei d’Europawahle gewënnt, ginn ech dovun aus datt ech EU-Kommissiounspresident ginn”. Dat sot den EVP-Spëtzekandidat Jean-Claude Juncker an der Emissioun Riicht Eraus um radio 100,7.

De Moment fir als CSV-Fraktiounschef zréck ze triede wier nach net do gewiescht. Datt hien elo wéint dem Europawahlkampf fir en Zäitraum vu 6 Wochen net sou intensiv wéi néideg an der nationaler Politik present ass, wier kee Problem.

Den CSV-Politiker huet seng Fuerderung no méi staarke Sanktiounen géint Russland verdeedegt. Et kéim ee wéint der Eskalatioun an der Ukrain-Krise net derlaanscht sech mat de Finanzstréim tëscht Russland an den europäesche Finanz-Zentren ze beschäftegen, sou de Jean-Claude Juncker... och wann esou Sanktiounen dem eegene Land schueden.

D’Diskussioun iwwert d’Auslännerwahlrecht wier an der blo-rout-grénger Regierung nach net ofgeschloss, sou d’Aschätzung vum CSV-Fraktiounschef. Wann d’Majoritéit zur Konklusioun kéim, datt e Referendum iwwert déi Fro geféierlech ass, da géif hien dat begréissen. Hie géif dann och net de Geck mat der Regierung maachen : "Wann eng Regierung dat richtegt mécht, soll ee sech net lëschteg iwwert se maachen".

Méi allgemeng huet de Jean-Claude Juncker der neier Regierung reprochéiert, duercherneen ze schwätzen. Et géif Zäit ginn, "datt de Regierungsdiscours eng kloer Richtung erkenne léisst".

Déi ganz Emissioun kann nei nogelauschtert ginn :

http://www.100komma7.lu/files/0/10/252340_riicht-eraus.mp3

Net verpassen

  • Rapport d'activités 2021

    Banner.jpg

    De Rapport d'activités 2021 vum radio 100,7 ass verëffentlecht ginn. E gëtt en Abléck an d'Aktivitéite vun de verschiddene Servicer a Redaktiounen am leschte Joer.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen