Santé Gefälschte CovidCheck-Certificaten: Zwee Fäll un de Parquet gemellt

Am Kontext vun de gefälschte CovidCheck-Certificaten huet d'Santé bis elo zwee Fäll un de Parquet gemellt: dat huet de Santés-Direkter Jean-Claude Schmit um Dënschdeg am 100,7-Interview gesot

Serge Kesseler / isc / tt

Covidcheck

Lauschteren


Bei deem engem Fall, géif et sech ëm dee vum suspendéierte Santés-Mataarbechter handelen. D'Zeitung Lëtzebuerger Land hat den 12. November gemellt, datt eng net-geimpfte Persoun a leedender Stellung eng aner Persoun gefrot hat, hir e fingéierten negative PCR-Test ze zertifiéieren.

Fälschungen duerch de System si schwéier ze kontrolléieren

Beim zweete Fall, deen d'Santé un de Parquet gemellt huet, géif et sech ëm e Fall a Relatioun mat engem Impfzenter handelen, esou de Jean-Claude Schmit. Souwäit hie wéisst, wier e Fall bekannt, an deem et gelonge wier, e falsche QR-Code ze produzéieren. Enquêtë vum Parquet géife lafen, esou de Santés-Direkter.

De Jean-Claude Schmit gëtt awer vun enger méi grousser Donkelziffer u gefälschte Certificaten aus, vu datt "net systematesch alles kontrolléiert gëtt".

Fäll an deenen Dokteren oder aner Leit aus Gesondheetsberuffer hei am Land géint Suen oder aus anere Grënn falsch Certificaten ausgestallt hätten, wieren him net bekannt, preziséiert de Santés-Direkter.

"Ech weess, datt esou Informatiounen zirkuléieren, do géifen et Leit ginn. Mee ech hu keng konkret Informatiounen. Wann do Leit Informatiounen hunn, déi kënnen dat natierlech ëmmer bei eis denoncéieren. An da maache mir eng Enquête fir ze kucke wat do géif geschéien."

Wann e QR-Code duerch de System gefälscht ass, wiere Kontrolle ganz schwéier, esou nach de Santés-Direkter. Et wier dowéinst wichteg, datt den Accès op dëse System "extrem limitéiert" gëtt.

Den delegéierten Digitaliséierungsminister Marc Hansen huet nach betount, datt falsch Certificaten dacks mat erfonnten Nimm an aneren EU-Länner erstallt ginn: dat géing et de Lëtzebuerger Autoritéiten net einfach maachen. Momentan géif op EU-Niveau geschwat ginn, wéi d'Länner kënne virgoen, fir gefälschte Coden ze blockéieren.

Méi zum Thema

Luc Feller
Impfcampagne

De Méindeg si ronn 41.000 Invitatioune fir déi sougenannte Booster-Impfung mat der Post erausgaangen. Jiddwereen iwwert 18 Joer kritt no sengem kompletten Impfscheema deemnächst esou eng Opfrëschungsimpfung ugebueden.

Alain de Bourcy
Covid-19

Dem Apdikter-Verband no mussen eng Partie Modalitéite gekläert ginn, ier d'Covid-19-Impfcampagne an den Apdikte ka starten. Ënner anerem wier eng Formatioun néideg, esou den Alain de Bourcy, fir datt d'Apdikter déi selwecht Reflexer hunn wéi e Medezinner.

Marc Hansen
Staat

An der Fonction Publique wier d'Aféiere vum CovidCheck-Regimm bis elo ouni gréisser Problemer verlaf, sou den zoustännege Minister. Wéi vill Staatsbeamten e CovidCheck-Certificat op hirer Aarbechtsplaz musse weisen, konnt hien net soen.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen