Däitschland Fortschrëtt bei de Gespréicher tëscht SPD, Gréngen an FDP

​Zënter enger gudder Woch sinn SPD, Gréng an FDP an Däitschland amgaang ze sondéieren. Et gëllt ze klären, ob d'Parteien sech eens genuch kënne ginn, fir a Koalitiounsverhandlungen anzetrieden. Iwwert d'Inhalter vun de Gespréicher héiert een erstaunlech wéineg. Dat ass éischter en Zeeche vu Fortschrëtt, mengt eisen Däitschland-Korrespondent Matthias Kirsch.

Matthias Kirsch (München) / cbi

Illustratioun Ampelkoalitioun
Foto: picture alliance / Geisler-Fotopress | Dwi Anoraganingrum/Geisler-Fotop

Iwwer Europa, Migratioun an nach eppes wier geschwat ginn. Dat sot de grénge Ministerpresident vu Baden-Württemberg, de Winfried Kretschmann, den Dënschdeg no de Gespréicher tëscht de méiglechen Ampel-Partner. Et sollt déi konkretsten inhaltlech Ausso vum Dag bleiwen an dat seet vill aus.

Nodeems déi lescht Woch déi éischt Sondéierungen tëscht Sozialdemokraten, Gréngen a Liberale gutt verlaf waren, hunn d'Parteien dës Woch domat ugefaangen, dat Ganzt ze verdéiwen. Wéi genau dat awer ausgesäit, doriwwer soen d'Vertrieder virun der Press näischt. Wann eppes gesot gëtt, da geet et méi ëm Gefiller an Atmosphär.

De Klimaschutz muss géigefinanzéiert ginn

Ob bis elo awer schonn Hürden opgedaucht sinn, do halen déi dräi Parteien dicht. Dat ass erstaunlech, mee aus hirer Siicht warscheinlech e gutt Zeechen. Géif eng Partei mierken, datt se bausse vir ass, géif se wuel no bausse stëppele goen - a wann et just wier, fir den Drock op d'Verhandlungspartner ze erhéijen.

Dobäi gëtt et jo, op d'mannst wann een d'Parteiprogrammer als Moossstaf hëlt, duerchaus Punkten, un deenen et Differenze gëtt. D'FDP wëllt zum Beispill op kee Fall iergendwellech Steiererhéijunge matdroen, d'Klimaschutzprogrammer vun Gréngen an SPD mussen awer iergendwéi finanzéiert ginn.

Kuerz virun offizielle Koalitiounsgespréicher

An den nächsten zwee Deeg wäert elo déi éischt haart Epreuve op d'Generalsekretäre vun den dräi Parteien zoukommen. Hinne gouf d'Aufgab iwwerdroen, aus de Sondéierungsgespréicher, déi et bis elo gouf, eng sougenannten Decisiounsgrondlag zesummenzedroen.

Jee nodeems wéi déi Recommandatioun ausgesäit, wäerten da viraussiichtlech Enn der Woch d'Parteigremie vun SPD, Gréngen an FDP doriwwer decidéieren, ob Koalitiounsgespréicher Sënn maachen, oder net.

Et bleiwen nach intern Hürden ze huelen

Et geet also elo an déi decisiv Phas. Mee: de Wee ass sécherlech nach laang. Well och wa sech d'Parteispëtzten eens ginn, hunn déi eenzel Parteien nach intern Hürden ze iwwerwannen.

Bei de Gréngen wäert wuel e klenge Parteidag driwwer entscheeden, ob si mat a Koalitiounsverhandlunge ginn. Bei der SPD ass dat ënner Ëmstänn och eng Méiglechkeet. Wann et bis souwäit ass, dierften d'Chance vun der Ampel awer net allze schlecht stoen: Bei de Membere vun SPD a Gréngen ass déi Rout-Gréng-Giel Koalitioun déi favoriséiert Regierungsoptioun.

An der Mediathéik:

Aktuelles / / Matthias Kirsch
Lauschteren

Méi zum Thema

Armin Laschet
Regierungsbildung

Eng Woch no der Bundestagswal wëllen d'Parteien de Weekend ënnerenee Sondéierungsgespréicher féieren. D'Unioun aus CDU/CSU wëll sech zwar bedeelegen, mee d'Chancen op eng Koalitioun fir si ginn ëmmer méi kleng.

Bundestagsgebai
Däitschland

Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Net verpassen

Programm

Dossieren

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen