Korruptiounsskandal Éisträich no der Regierungskris

Gutt zéng Deeg sinn et hier, datt de Sebastian Kurz als éisträichesche Bundeskanzler zeréckgetrueden ass, an domat d'Regierungskris an der Alperepublik fir d'éischt emol eriwwer war. An trotzdeem suergt déi Causa nach ëmmer fir Schlagzeilen. Nei Revelatioune weisen, wéi de Sebastian Kurz a säin Entourage Drock op Fuerschungsinstituter gemaach hunn. An ausgerechent elo, wou d'Justiz géint héichrangeg Politiker ermëttelt, muss d'Regierungskoalitioun decidéieren, ob déi sougenannte Kronzeugenregelung bestoe bleift.

Stephan Polet / cz

Fändel Eisträich
Foto: picture alliance / Zoonar | BUTENKOV ALEKSEY

Ee Gerücht ass déi lescht Deeg ëmmer nees an den éisträichesche Medie kurséiert: Eng zentral Figur an der Korruptiounsaffär, déi d'Regierungskris ausgeléist huet, wéilt auspaken. Konkret heescht dat, si seet géint aner Bedeelegter an der Affär, dorënner och den Ex-Kanzler Sebastian Kurz, aus a kritt dofir eng méi kleng Strof. D'Basis dofir ass déi sougenannte Kronzeugenregelung. Allerdéngs leeft dat entspriechend Gesetz dozou Enn des Jores aus.

Fir datt d'Gesetz och an Zukunft weider gëllt, musse sech déi zwou Regierungsparteien eenegen. Dat sinn engersäits déi Gréng, déi de Récktrëtt vum Sebastian Kurz gefuerdert haten, an anerersäits deem seng konservativ ÖVP, déi weiderhin vu falsche Virwërf géint hire Parteichef schwätzt. Et misst nach verhandelt ginn, heescht et vu béide Säiten. Wou genee d'Meenungsverschiddenheete bei der Kronzeugenregelung leien, gëtt net gesot.

Och Drock op Wirtschaftsfuerschungsinstituter

Allgemeng ass d'Verhältnis tëscht den zwou Koalitiounsparteien zanter der Regierungskrise ganz ugespaant. Ausgeléist gi war dës politesch Krise virun zwou Wochen duerch Ermëttlunge géint den deemolege Kanzler Sebastian Kurz a säin Entourage. Et geet dobäi em Virwërf vu Korruptioun a Verontreiung aus der Zäit wou de Sebastian Kurz nach net Kanzler a Parteichef war. Sou soll eng grouss Boulevards-Zeitung Regierungsinserater am Tosch fir favorabel Berichterstattung kritt hunn. Och soll eng Demoskopin iwwer Scheinrechnunge mat Steiersue bezuelt gi sinn, fir gefälschten Ëmfroen ze maachen. All déi Beschëllegt weisen d'Virwërf vu sech.

Scheinbar wollt een awer net nëmmen Emfroeresultater kontrolléieren, mee och wirtschaftspolitesch Fuerschung. Dat geet aus rezente Medieberichter ervir. Sou soll en enke Vertraute vum Sebastian Kurz an engem Chatgespréich dovu geschwat hunn, d'Cheffe vun den zwee gréisste Wirtschaftsfuerschungsinstituter an Éisträich "op Linn" ze bréngen. Ee vun den zwee erwäänten Wirtschaftsfuerscher huet an engem Interview bestätegt, datt him mat Budgetskierzunge gedreet gouf. Deen aneren ass mëttlerweil Aarbechtsminister. No de Revelatiounen huet hien awer betount, datt hien a senger Zäit als Direkter vum Fuerschungsinstitut ëmmer all Ameschungsversuch kloer zeréckgewisen hätt.

An der Mediathéik:

Aktuelles / / Stephan Polet
Lauschteren

Méi zum Thema

Sebastian Kurz
ÉISTRÄICH

Den éisträichesche Bundeskanzler Sebastian Kurz trëtt als Regierungschef zeréck a wiesselt als Fraktiounschef an d'Parlament. Dat huet hie gëschter Owend iwwerraschend annoncéiert. Säin Nofollger soll den aktuellen Ausseminister Alexander Schallenberg ginn.

Sebastian Kurz
Éisträich

De Sebastian Kurz huet sech de Froe vun engem Riichter misse stellen. Déi politesch Parteien deiten d'Resultat ënnerschiddlech: Onschold bewise soen déi eng, mangelnde Respekt virun der Justiz déi aner.

 

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen