No der Pandemie wëllen déi Responsabel vum Stater Tourismus bewosst op de Wee goen, fir de Visiteur net méi als Tourist un ze gesinn, mee als "Awunner op Zäit", seet den Tom Bellion vum LCTO. Am Konkrete soll domat dat, wat den Tourismussecteur ubitt, méi authentesch ginn.
D'Qualitéit vun de Produkter muss och stëmmen, esou den Direkter vum LCTO. Hien nennt e Beispill: D'Zuel vun de Leit, déi bei enger Visitt guidée duerch d'Stad derbäi ass, soll méi kleng ginn. Virun der Pandemie haten déi Gruppen eng Gréisst vu bis zu 30 Leit - elo sollen et der maximal 20 sinn, fir dass jiddweree méi dervun huet, esou den Tom Bellion.
Frou iwwer 2022
"Mir si besonnesch frou, datt d'Péitruss-Kasematten zanter hirer Reouverture esou gutt besicht sinn", ënnersträicht den Tourismusexpert. D'lescht Joer goufen do iwwer 8.500 Visiteure gezielt.
E Publikumsmagnéit bleift weiderhin awer och de Palais mat 5.000 Visiteuren:"Mir schaffen drun, och de Prozentsaz vu Leit, déi nach feelen, erëm ze kréien", versprécht den Tom Bellion.
D'Visiteuren, déi vun anere Kontinente kommen ewéi aus Asien, oder och déi vum amerikanesche Kontinent, wiere bis elo nach net erëm komm.
D'Leit bleiwen iwwregens tëschent zwee an 2,5 Deeg an der Stad Lëtzebuerg.