Debatt iwwer Auslännerwahlrecht ass lancéiert

edit2-1024x682.jpg

D’CSV an d’Regierung si sech an de grousse Linnen eens fir den Zougank zur Lëtzebuerger Nationalitéit ze vereinfachen. Onofhängeg dovu wënscht d’Regierung sech zousätzlech an der Verfassung en Auslännerwahlrecht, woumat d’CSV net averstan ass. Dat huet d’Diskussioun am Riicht Eraus Spezial vum 25. Abrëll gewisen. Sechs Woche virum consultative Referendum vum 7. Juni hunn de Vize-Premier Etienne Schneider (LSAP), den CSV-President Marc Spautz, de CGFP-Generalsekretär Romain Wolff an de Jean-Jacques Rommes, Generaldirekter vun der UEL, dem Dachverband vun den Entreprisen, iwwer d’Auslännerwahlrecht diskutéiert.

De Marc Spautz huet dem Etienne Schneider virgeheit, d’Regierung wéilt d’Vollek als Geisel huele well d’Regierung fir en Auslännerwahlrecht net déi néideg Zwee-Drëttel-Majoritéit an der Chamber huet. Den Etienne Schneider sot sech “katastroféiert” iwwert déi Ausso.

E Lapsus gouf et direkt am Ufank vun der Table Ronde, déi an der Chambre de Commerce opgeholl gouf : den Etienne Schneider sot, fir d’Auslännerwahlrecht missten d’Nët-Lëtzebuerger just ee vun de Critèren erfëllen, dat heescht 10 Joer am Land wunnen oder scho bei Gemengen oder Europawahle matgemaach hunn. Richteg ass awer, datt déi zwou Konditioune mussen zesummen erfëllt sinn. De Marc Spautz huet dem Vize-Premier (LSAP) virgeheit, d’Referendumsfroen net ze kennen.

De Romain Wolff (CGFP) sot, d’Staatsbeamtegewerkschaft wier géint d’Auslännerwahlrecht awer net géint eng méi grouss Integratioun vun Net-Lëtzebuerger. Egal wéi de Referendum ausgeet misst d’Chamber sech un d’Resultat halen, esou de Message un de Marc Spautz (CSV), deen sech net fest geluecht huet, ob d’CSV sech un d’Resultat hale wëll.

De Jean-Jacques Rommes (UEL) ass der Meenung, datt d’Auslännerwahlrecht just ee vu méi Elementer ass fir den “demokrateschen Defizit” zu Lëtzebuerg ze behiewen. D’Fonction Publique wier an der Wielerschaft iwwerrepresentéiert, well d’Auslänner keen nationaalt Wahlrecht hunn.

D’Table Ronde, mat interessante Reaktiounen an Erfahrungsberichter aus dem Publikum, kënnt Dir hei nolauschteren :

20150424-DSCF464320150424-DSCF463520150424-DSCF465420150424-DSCF464020150424-DSCF462420150424-DSCF4630

 

Net verpassen

Programm

  • Noriichten

  • On air

    Resonanzen

  • Am Nomëtteg vun 3 bis 6

  • Panorama

  • Tockcity

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen