US-Presidentschaftswahlen D'USA hu scho verluer

Egal ob Donald Trump oder Hillary Clinton - Nom US-amerikanesche Wahlkampf waart op Amerika eng däischter Zukunft. D'Wahlcampagne huet grousse Schued ugeriicht an ee schlecht Bild vun den USA gezeechent.

Simone Beck / cwi

Meenung Simone Beck
Simone Beck

Egal wien d'US-Presidentschaftswahle gewënnt, Amerika huet elo scho verluer. Deen onsägleche Wahlkampf huet d'amerikanesch Gesellschaft - nach méi wéi si et schonn ass - zerrappt, d'politesch Institutioune vum Land a Fro gestallt an d'aussepolitesch Stellung vun den USA staark geschwächt.

D'Gesellschaft ass gespléckt wéi seelen: Op där enger Säit, esou den Donald Trump, dat buedemstännegt, éierlecht Vollek,. Op där anerer Säit eng dekadent a korrupt Elite. Déi Leit, déi an den USA den Donald Trump wielen, gehéieren (heefeg) zu den ënneschte soziale Schichte mat wäisser Hautfaarf. Fir si war schonn e schwaarze President eng Zoumuddung. An elo och nach e weiblechen?

Da léiwer e vulgären, inkompetenten, rassistesch a sexistesch Businessmann, deem seng verbal Kompetenzen en Tweet net iwwerschreiden. Awer ob den Donald Trump President gëtt oder net, hien huet d'Veruechtung vun Homosexuellen a Fraen, d'Veruerteelung vun Immigranten a Moslemen, d'Béie vun Tatsaachen a primär Provokatioune salonfäeg gemaach. A wann de Republikaner President sollt ginn, da sinn all déi Haltungen duerch eng Wal sanktionéiert an am héchsten Amt verankert.

Phänomen Hitler

Politesch Observateure gesi mat Suerg en Discours, dee fatal un dee vum Adolf Hitler erënnert. Ee vun hinne sot: "Duerch d'Eropkomme vum Trump verstinn ech de Phänomen Hitler." D'Observateure si besuergt iwwer d'Afrostellung vun deenen Institutiounen, déi bis elo den amerikanesche Staat gedroen hunn. Den Donald Trump eleng kann all Problemer léisen (I alone can fix it). Eng kritesch Press brauch hien net. Genereel aus der amerikanescher Arméi, déi net senger Meenung sinn, géif hie kuerzer Hand entloossen an duerch méi genehmer ersetzen.

An dann déi Ausso, déi mam Feier spillt: "D'Wale sinn truquéiert an ech kennen d'Resultat nëmmen un, wann ech gewannen." A wann net? Kënnt et dann zu engem Biergerkrich an den USA? Eng vun de Grondregele vun enger Demokratie ass et nun emol, datt de Verléierer - a mat him all déi Leit, déi hie gewielt hunn - eng Defaite unerkennt. De Risiko vun enger gewaltbereeter Bewegung vu frustréierten Trump-Wieler ass reell.

Fir dat do, all déi Affer?

Wat fir ons Europäer vu grousser Wichtegkeet ass, ass de Schued, deen den Amerikaner hiert Bild am Ausland geholl huet. All véier Joer ass de Presidentewahlkampf an den USA déi weltwäit Vitrinn, an där d'Amerikaner hir demokratesch Wäerter a Prozedure weisen. Dat ass awer dës Kéier grëndlech schif gaangen. Besonnesch an deene Länner, an deenen d'Amerikaner hiert Verständnis vun Demokratie erbäigebommt hunn, sinn d'Leit fassungslos. Fir dat do, all déi Affer?

Den US-Ausseminister John Kerry sot kierzlech zu London viru Studenten, d'US-Wahlcampagne wier "downright embarrassing". Hie géif elo scho spieren, wéi vill si dem Bild vun Amerika an der Welt geschuet hätt. Am Walkampf huet Amerika sech als Muecht duergestallt, déi ënnergeet. Déi moralesch a politesch bankrott ass. China a Russland stinn an de Startlächer.

De 45. President vun der Vereenegte Staaten wäert op ville Fronten ze kämpfen hunn, souwuel doheem wéi dobaussen. Dofir schéngt et - op mannst - onvirsiichteg, ee Mënsch wéi den Donald Trump ze wielen, deen op d'Fro wien hien an der Aussepolitik beréit, geäntwert huet: "Ech schwätze mat mir selwer als éischten, well ech hunn e ganz gudde Kapp - a very good brain - an ech hu scho villes gesot". Dozou ass näischt méi ze soen.

An der Mediathéik:

Fräie Mikro / / Simone Beck
Lauschteren

Méi zum Thema

US-Wahlen
USA

An dësem Dossier fannt Dir wichteg Artikelen iwwert d'US-Presidentschaftswahlen 2016.

Barack Obama an North Carolina
Wahlkampf USA

Kuerz virun der US-Presidentschaftswahl war de Barack Obama an North Carolina, fir déi afro-amerikanesch Wieler ze mobiliséieren. Ma déi erwaarde sech awer vu béide Presidentschaftskandidaten net vill.

Denis Scuto
Faschismus

An hirer Proklamatioun zum nationale Commemoratiounsdag huet d'Lëtzebuerger Regierung un den Appell "Ni méi Faschismus" erënnert. An den USA mécht e Presidentschaftskandidat dee Faschismus salonfäeg.

Jonathan Alter a Michael Meehan
US-Presidentiellen

Eng Rekordzuel u Leit hunn déi éischt Presidentschaftsdebatt tëscht Trump a Clinton verfollegt. Wou kënnt deen Interessi hier a wat fir en Afloss hunn d'Medien op d'Presidentiellen?

Programm

Net verpassen

Dossieren

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen