Reportage Bluttspenden: Wéi geet dat?

Dat Lëtzebuergescht Rout Kräiz huet de Mëttwoch zum Bluttspenden opgeruff, well d'Reserve just nach fir sechs Deeg duergoungen. Dorops hin hu vill Leit sech fir d'éischte Kéier als Bluttspender gemellt. Mee wéi leeft dee Prozess of a wat muss ee wëssen?

Tom Haas / cz

Illustratioun Bluttspenden
Illustratioun Bluttspenden (Foto: Bigstock / Vitador)

Lauschteren

Wee Blutt spende wëll, kann den Ament einfach tëscht Méindes a Freides ouni Rendez-Vous beim Roude Kräiz laanscht goen. Um Boulevard Joseph 2, kuerz éiert een op de Glacis kënnt, steet e grousst Schëld, op deem Don de Sang steet, virum Gebai mat der Nummer 42. Do ginn ech eran - der Madamm an der Loge ginn ech meng Carte d'Identité a meng Carte de Securité Sociale a kréie vun hir e Questionnaire. Mat dem dierf ech dann weider op den éischte Stack, an e Raum, an deem siwe rout, bequeem Still schonn op Bluttspender waarden. Hei ginn ech fir d'éischt getest, wéi d'Infirmière mir erkläert.

"Also et ass esou, well mer jo keng Valeurë vun äre Bluttwäerter hunn, maache mer elo e Schnelltest, wou mer den Hemoglobin testen. Wann déi Valeur gutt ass, da steet u sech näischt am Wee fir Blutt ze spenden. Da gëtt dono nach de Questionnaire gekuckt."

E puer Punkte sinn ze beuechten

Duerno tigeren ech eriwwer an d'Waardezëmmer a fëlle mäi Questionnaire aus - do stinn allerhand Froen zu menger medezinescher Virgeschicht, zu Reesen an zu mengem Sexualverhalen drop. Wie sech doriwwer am Virfeld informéieren wëll, fënnt déi Infoen och op dondusang.lu. Wann een zum Beispill viru manner wéi sechs Méint an engem Risikogebitt fir Malaria war, dierf ee kee Blutt spenden. Dat gëllt och, wann een an de leschte véier Méint en neie Sexualpartner hat.

Mam ausgefëllte Questionnaire ginn ech duerno bei en Dokter, dee mat mir déi eenzel Froen duerchgeet. Hien huet och d'Resultat vu mengem Schnelltest.

Eng einfach a séier Prozedur

Meng Äntwerte sinn ok, ech däerf Blutt spenden. Nach kuerz an d'Cafeteria - et soll ee virdrun eppes giess hunn - dann ginn ech zréck op de roude Stull a ginn un de Schlauch ugeschloss.

Gepickt ginn ech lo an deen aneren Aarm, deen net fir den Test misst duerhalen. Duerno muss ech nach kuerz sëtzebleiwen, fir ze kucken, op et mer net schlecht gëtt, dann däerf ech weider op d'Aarbecht. An dräi Méint kréien ech dann elo déi nächst Invitatioun per Mail - komplizéiert ass eppes aneres.

Méi zum Thema

Bluttspend
Dr Andrée Heinricy

Well d'Stocken u Konzentrater vu roude Bluttkierpercher zeréckgaange sinn a wéinst de Feierdeeg lancéiert d'Croix-Rouge een Appell fir Blutt ze spenden, erkläert d'Doktesch Andrée Heinricy vun der Croix-Rouge.

centre de transfusion sanguine.jpg
Dr Andrée Heinricy

Bannent de leschte Wochen ass d'Zuel vu Bluttspenden ze niddereg fir eng Reserv ze garantéieren, déi d'Besoine vu 7 Deeg géifen decken, erkläert de Centre de transfusion sanguine vun der Croix-Rouge.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen