Gesondheet Afepouken: CSMI recommandéiert Impfung fir veschidde Persounegruppen

Am Kampf géint d'Afepouke recommandéiert de Conseil Superieur des Maladies Infectieuses eng Impfung just fir bestëmmt Persounegruppen. Dat geet aus dem Avis ervir, deen haut publizéiert gouf. Eng Impfung géint Afepouke gëtt fir homosexuell Männer an Transmënsche mat wiesselende Sexualpartner a fir Sexaarbechter recommandéiert.

chi / Marlène Clement / cz

Afepouken Impfung
Foto: Bigstock / HalfPoint

Lauschteren

Bei Mënsche mat méi wei engem Sexualpartner a besonnesch bei homosexuelle Männer géife bei den Afepouken déi meescht Fäll optrieden, sou d'Begrënnung vum CSMI. Leit mat engem schwaachen Immunsystem a Fleegepersonal sollte sech am Fall vun enger Expositioun mam Virus sou séier wéi méiglech an den zwou Wochen drop impfe loossen fir ee schwéiere Verlaf ze verhënneren.

Impfung, Contact Tracing a PCR-Tester

Fir eng Immuniséierung bräicht een zwou Dosissen innerhalb vun engem Mount. Fir Leit mat engem schwaachen Immunsystem recommandéiert d'Santé eng drëtt Impfdosis. Versprëtzt gëtt den Imfpstoff am CHL an der Stad. Fir Mannerjäreger wier den Impfstoff net autoriséiert. Am Laf vum Mount soll Lëtzebuerg 1.400 Impfdosisse geliwwert kréien.

Fir eng weider Verbreedung vum Virus ze verhënneren, géif een op Contact Tracing a PCR-Tester setzen. Extra präventiv Moossname solle fir de Gesondheetssecteur an Ugrëff geholl ginn. Betraffe Patiente sollen isoléiert ginn.

Och liewensgeféierlech Probleemer mam Nervesystem si méiglech

D'Waasserpouke ginn iwwer Kierperflëssegkeeten iwwerdroen. Am Fall vun enger Infektioun kënnt et zu Symptomer wéi Féiwer, Kappwéi, geschwollene Lymphkniet a Blosen, déi zu Pautsche ginn. Der Santé no kéint et bei engem schwéiere Krankheetsverlaf och zu Entzündungen a Problemer mam Nervesystem kommen. D'Inkubatiounszäit vum Virus leit tëscht dräi an 21 Deeg. De Krankheetsverlaf hätt an de meeschte Fäll eng Dauer vun zwou bis véier Wochen, esou d' Santé.

Bis elo eelef Mënsche weltwäit um Virus gestuerwen

Infektiéis wier ee bis d'Pautsche verschwannen. Wéinst dem weltwäiten Ausbroch vun den Afepouken huet d'Weltgesondheetsorganisatioun WHO den 23. Juli eng gesondheetlech Noutsituatioun mat internationaler Portée ausgeruff. Bis gëschter goufen et weltwäit ronn 25.000 Fäll, eelef Mënsche si bis elo um Virus gestuerwen, esou d'WHO.

Zu Lëtzebuerg si momentan 31 Fäll vun den Afepouke bekannt. D' lescht Woch waren et der nach 23.

Méi zum Thema

Joël Mossong
Virus

Zu Lëtzebuerg an an den Nopeschlänner wier nach kee Fall vun Afepouken detektéiert ginn, seet de Joël Mossong. Dat kéint an den nächsten Deeg awer de Fall sinn, esou den Epidemiolog am 100,7-Interview.

Net verpassen

Programm

Dossieren

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

  • Dossier: Cannabis-Legalisatioun

    Nach am Laf vun dësem Joer soll e legale Kader ausgeschafft ginn, fir e staatlech kontrolléierten Ubau vu Cannabis fir medezinesch Zwecker zu Lëtzebuerg méiglech ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen