Déi néng, déi untrieden, sinn also d'office gewielt, a musse sech ënnereneen eens ginn, wien déi nächst sechs Joer Buergermeeschter a Schäffe gëtt. Weiler-zu-Tuer ass eng Gemeng vun 2.500 Leit, de Buergermeeschter vun do huet 13 Stonne Congé politique fir senger Funktioun nozegoen. Dat géif bei wäitem net duergoen, sou de Vincent Reding.
"Dat soll eng voll Tâche sinn, ech plädéiere wierklech dofir, dass mer de Beruff och als Beruff acceptéieren. Dat ass net samschdes fësche goen, nee, dat ass ganz komplex. Do hu mer vill Matièren, vill Circulairen a vill Gesetzer un déi mer eis mussen halen, nieft all deenen Doleancen a Projeten, déi ee jo selwer an der Gemeng huet."
Och oder grad a klenge Gemengen hätt eng voll Tâche a sengen Ae Virdeeler. Well grad a méi klenge Gemenge kéint de Buergermeeschter op manner Personal zeréckgräifen a misst Projeten direkt leeden. "An dofir ass den Zäitopwand och méi grouss. An dofir sollt de Buergermeeschter hei am Land professionaliséiert ginn."
Inkompatibilitéiten am Walgesetz op de Leescht huelen
De Buergermeeschter vun der klenger Majorzgemeng Weiler zum Tuer plädéiert dofir, d'Lëscht vun den Incompatibilitéiten am Walgesetz op de Leescht ze huelen. Am Artikel 11 vun deem Gesetz sinn all déi Funktiounen a Beruffer opgelëscht, déi een net ausüben däerf, wann ee Member vun engem Gemengerot ass. De Vincent Reding bedauert, datt doduerch eng Rei Leit, déi interesséiert wieren, aktiv Gemengepolitik ze maachen, ausgeschloss ginn. Hie wëll net acceptéieren, datt een net e fräiwëllegen Engagement ausüben a gläichzäiteg dat demokratescht Recht hunn de Politikerjob auszeüben.