D’LSAP-Fraktiounscheffin Taina Bofferding huet kritiséiert, datt et een extrem optimistesche Budget an onsécheren Zäit wier.
Well ënner anerem alles op de Wuesstem géif gesat ginn, géif d’Rechnung net opgoen, huet d’Fraktiounscheffin vun der LSAP fest gestallt. D’Taina Bofferding huet vun engem “zwanghafte Glawen un d’Croissance” geschwat.
„D’Recettë ginn iwwerschat, d’Ambitioun fir z’investéiere geet erof, an et feelt un der Koherenz tëschent den annoncéierte Politicken an de Prognosen, wéi se am Budget sinn.“
Déi geplangten héich Defiziter wieren net seriö, esou de Fraktiounschef vun der ADR. De Fred Keup huet bedauert, datt de Budget keng Ziler géif setzen, déi fir d’Land sollen erreecht ginn.
Fir d‘ADR leien d‘Prioritéiten an de Beräicher Sécherheet, Mobilitéit, Logement, Energiepräisser a Kaftkraaft. Donieft wéilt d‘ADR och d‘Finanzplaz schützen.
Sam Tanson: D'Depensë gi weider méi staark an d'Luucht wéi d'Recetten
Mat dësem Budget géif d’Regierung d’Depensen net bremsen, esou d’Kritik vun der grénger Deputéierter Sam Tanson.
„Dir spuert net. D’Cour des Comptes ënnersträicht dat an hirem Avis. Mee och dat wat d’Rapportrice gesot huet, ass irritéierend. D’Depensë gi weider an d’Luucht. Si gi weider och méi staark an d’Luucht wéi d’Recetten, an dat och nach dat nächst Joer.“
Dëse Budget géif si net optimistesch stëmmen, wat no den Europawale vun der Regierung no kënnt, esou nach d’Sam Tanson de Mëtteg an der Chamber.